बदलापूरमधील अत्याचारप्रकरणी मविआचा ‘ 24 ऑगस्टला महाराष्ट्र बंदची घोषणा,नाना पटोले यांची माहिती
मुंबई :- दि.21 ऑगस्ट ( पुनम महाजन )
24 ऑगस्ट रोजी महाराष्ट्र बंद : बदलापूर लैंगिक शोषण प्रकरणाच्या विरोधात महाविकास आघाडीने 24 ऑगस्ट रोजी महाराष्ट्र बंदची हाक दिल्याची घोषणा काँग्रेस प्रदेशाध्यक्ष नाना पटोले यांनी केली आहे.
बदलापुरातील लैंगिक शोषण प्रकरणाचा वाद झपाट्याने वाढत आहे. या संवेदनशील विषयावर महाविकास आघाडीच्या बैठकीत चर्चा झाली, ज्यामध्ये काँग्रेसचे प्रदेशाध्यक्ष नाना पटोले यांनी २४ ऑगस्टला महाराष्ट्र बंद पुकारल्याची घोषणा केली.
क्राईम एफ आय आर ला,मिळालेल्या माहिती नुसार नाना पटोले यांनी आपल्या निवेदनात म्हटले आहे की, बदलापूरमधील या लैंगिक शोषणाने समाज हादरला आहे.
आज महाराष्ट्रात लहान मुलीही सुरक्षित नाहीत, ही अत्यंत चिंताजनक आहे. ही घटना महाराष्ट्राचा अपमान आहे. ही शिक्षण संस्था भाजप आणि आरएसएसशी जोडलेली असल्याने सरकारने हे प्रकरण दडपण्याचा प्रयत्न केल्याचे सुरुवातीला दिसते.
यामुळे हे प्रकरण लपविण्याचा प्रयत्न केला जात आहे. या घटनेवर राजकारण करायचे नसून, सत्तेचा गैरवापर स्पष्ट दिसत असल्याचे पटोले यांनी स्पष्ट केले.
ते पुढे म्हणाले की, महाराष्ट्राची प्रतिमा सातत्याने खराब होत आहे. छत्रपती शिवाजी महाराज, शाहू, फुले, आंबेडकर यांच्या विचारांनी प्रेरित महाराष्ट्राचा अपमान केला जात आहे, जो अस्वीकार्य आहे. या घटनेचा आम्ही तीव्र निषेध करतो.
या घटनेवर महायुतीच्या एका नेत्याने महिला पत्रकारासोबत केलेल्या आक्षेपार्ह टिप्पणीवरही नाराजी व्यक्त करण्यात आली आहे.
या प्रकरणाच्या निषेधार्थ 24 ऑगस्ट रोजी महाराष्ट्र बंदचे आयोजन करण्यात आले असून त्यात महाविकास आघाडीचे सर्व मित्रपक्ष, विविध संघटना, शाळा, महाविद्यालये, दुकानदार, नागरिक सहभागी होणार आहेत. महाराष्ट्रातील जनता आता या नालायक सरकारला योग्य ती जागा दाखवायला तयार आहे, असा विश्वास नाना पटोले यांनी व्यक्त केला.
दरम्यान, बदलापूर प्रकरणात उज्ज्वल निकम यांची विशेष सरकारी वकील म्हणून नियुक्ती करण्यात आली आहे. या नियुक्तीवर विरोधी पक्षनेते विजय वडेट्टीवार यांनी प्रश्न उपस्थित करत सरकारवर टीका केली आहे. ते म्हणाले की, ज्या शैक्षणिक संस्थेशी हे प्रकरण आहे ती राजकीय पक्षाशी संबंधित आहे आणि त्याच पक्षाच्या वकिलाची, ज्यांनी यापूर्वी लोकसभा निवडणूकही लढवली आहे,आणि त्यांचीच विशेष सरकारी वकील म्हणून नियुक्ती करण्यात आली आहे. उद्या हे प्रकरण दडपले तर त्याची जबाबदारी कोण घेणार, अशी भीती वडेट्टीवार यांनी व्यक्त केली.
