अकरा वर्षांनंतर पुन्हा उर्दू शिक्षकाचा जिल्हास्तरावर सन्मान,
उर्दू शिक्षण क्षेत्राचा गौरव; खान मुबश्शेरा किफायत खान यांना जिल्हा आदर्श शिक्षक पुरस्कार!
धुळे, || दि. ५ सप्टेंबर २०२६ || (फिरोज खान) :- शिक्षक दिनाचे औचित्य साधून धुळे जिल्हा परिषद शिक्षण विभागाच्या वतीने जिल्ह्यातील आदर्श शिक्षकांचा गौरव करण्यात आला. यावेळी तब्बल अकरा वर्षांनंतर उर्दू शिक्षण क्षेत्रातील शिक्षकाचा जिल्हास्तरावर सन्मान झाल्याने उर्दू शिक्षण क्षेत्रात आनंदाचे वातावरण निर्माण झाले आहे.
धुळे जिल्ह्याचे पालकमंत्री नामदार जयकुमार रावल यांच्या हस्ते आज, ५ सप्टेंबर रोजी धुळे जिल्हा परिषद येथील कै. यशवंतराव चव्हाण सभागृहात जिल्हा आदर्श शिक्षक पुरस्कार प्रदान करण्यात आले. यामध्ये साक्री तालुक्यातील पिंपळनेर येथील जिल्हा परिषद उर्दू शाळेच्या प्राथमिक शिक्षिका खान मुबश्शेरा किफायत खान यांना त्यांच्या शैक्षणिक कार्याची, विद्यार्थ्यांसाठी केलेल्या उल्लेखनीय योगदानाची आणि उर्दू शिक्षण क्षेत्रातील कार्याची दखल घेत जिल्हा आदर्श शिक्षक पुरस्काराने सन्मानित करण्यात आले.
खान मुबश्शेरा किफायत खान यांना मिळालेला हा सन्मान केवळ त्यांच्या कार्याचा गौरव नसून, उर्दू शिक्षण क्षेत्रासाठीही अभिमानाची बाब मानली जात आहे. अकरा वर्षांनंतर जिल्हास्तरावर उर्दू शिक्षकाचा सन्मान झाल्याने शिक्षक, विद्यार्थी, पालक तसेच उर्दू शिक्षणप्रेमींमध्ये उत्साहाचे वातावरण निर्माण झाले आहे.
याच कार्यक्रमात नरडाणा जिल्हा परिषद शाळेचे शिक्षक दिनेश गुलाबराव धनगर, धुळे ग्रामीण विभागातून चंद्रकला परदेशी तसेच शिरपूर तालुक्यातील लोकी येथील जिल्हा परिषद शाळेचे शिक्षक चंपालाल गयबू पाटील यांनाही त्यांच्या उल्लेखनीय शैक्षणिक कार्याबद्दल जिल्हा आदर्श शिक्षक पुरस्काराने गौरविण्यात आले.
शिक्षक हा समाज घडविणारा महत्त्वाचा घटक असून, आपल्या ज्ञानातून आणि कार्यातून विद्यार्थ्यांचे भविष्य घडविणाऱ्या शिक्षकांचा अशा पुरस्कारांच्या माध्यमातून सन्मान होणे ही निश्चितच प्रेरणादायी बाब आहे. अकरा वर्षांनंतर उर्दू शिक्षण क्षेत्रातील शिक्षकाला मिळालेला हा जिल्हास्तरीय सन्मान पिंपळनेरसह संपूर्ण धुळे जिल्ह्यासाठी अभिमानाचा क्षण ठरला आहे.