लाचखोर वरिष्ठ सहाय्यकाला न्यायालयाकडून शिक्षा….

३ हजारांची लाच मागून २ हजार रुपये स्वीकारताना रंगेहाथ पकडलेल्या लोकसेवकाला १ वर्ष कारावासाची शिक्षा

नंदुरबार || दि. ३१ ऑगस्ट २०२६ || (फिरोज खान) :- शासनाकडून मंजूर झालेल्या वैद्यकीय बिलाची रक्कम तक्रारदाराच्या बँक खात्यात जमा करण्यासाठी ३ हजार रुपयांची लाच मागून तडजोडीनंतर २ हजार रुपये स्वीकारणाऱ्या लोकसेवकाला मा. जिल्हा व सत्र न्यायालय, नाशिक यांनी दोषी ठरवून शिक्षा सुनावली आहे.

आरोपी लोकसेवक रामचंद्र नरसु माकरे, वरिष्ठ सहाय्यक, वर्ग-३, राज्य कामगार विमा योजना रुग्णालय, सातपूर, नाशिक यांनी तक्रारदाराच्या शासनाकडून मंजूर वैद्यकीय बिलाची रक्कम बँक खात्यात जमा करण्यासाठी दिनांक १६ सप्टेंबर २०१४ रोजी शासकीय पंचासमक्ष ३ हजार रुपयांची लाचेची मागणी केली होती. तडजोडीनंतर २ हजार रुपये लाचेची रक्कम स्वीकारण्याचे ठरले.

त्यानुसार, राज्य कामगार विमा योजना रुग्णालय, सातपूर, नाशिक येथील वैद्यकीय खर्च प्रतिकृती कक्षासमोरील हॉलमध्ये आरोपी माकरे यांनी तक्रारदाराकडून २ हजार रुपयांची लाचेची रक्कम स्वीकारली. त्यावेळी लाचलुचपत प्रतिबंधक विभागाच्या पथकाने त्यांना रंगेहाथ पकडले.

या प्रकरणी सातपूर पोलीस ठाणे, नाशिक शहर येथे गु.र.नं. ३०६९/२०१४, भ्रष्टाचार प्रतिबंध अधिनियम, १९८८ मधील कलम ७, १३(१)(ड) सह १३(२) अन्वये दिनांक १६ सप्टेंबर २०१४ रोजी गुन्हा दाखल करण्यात आला होता.

तत्कालीन तपासी अधिकाऱ्यांनी या गुन्ह्याचा तपास पूर्ण करून दिनांक ९ एप्रिल २०१५ रोजी मा. जिल्हा व सत्र न्यायालय, नाशिक येथे दोषारोपपत्र दाखल केले. सदर खटल्याचा स्पेशल केस क्रमांक १९/२०१५ असा होता.

या खटल्याची सुनावणी मा. जिल्हा व सत्र न्यायाधीश श्री. अमित विनायक खारकर, नाशिक यांच्या न्यायालयात झाली. न्यायालयाने आरोपी लोकसेवक रामचंद्र नरसु माकरे यांना दोषी ठरवून भ्रष्टाचार प्रतिबंध अधिनियम, १९८८ चे कलम ७ अन्वये ६ महिने कारावास व १ हजार रुपये द्रव्यदंड, तसेच दंड न भरल्यास १ महिना साधा कारावास अशी शिक्षा सुनावली. तसेच भ्रष्टाचार प्रतिबंध अधिनियम, १९८८ चे कलम १३(२) अन्वये १ वर्ष कारावासाची शिक्षा सुनावण्यात आली आहे.

सदर खटल्यात मा. श्री. भारत तांगडे, पोलीस अधीक्षक, लाचलुचपत प्रतिबंधक विभाग, नाशिक परिक्षेत्र, नाशिक, तसेच मा. श्री. प्रदीप मैराळे, अपर पोलीस अधीक्षक आणि मा. श्रीमती कविता फडतरे, अपर पोलीस अधीक्षक यांच्या मार्गदर्शनाखाली श्रीमती रुपाली खांडवी, पोलीस निरीक्षक व कोर्ट पैरवी अंमलदार श्री. प्रदीप काळोगे, पोलीस हवालदार यांनी कामकाज पाहिले. सरकार पक्षातर्फे सरकारी अभियोक्ता श्री. शिरीष कडवे व श्री. सचिन गोरवाडकर यांनी न्यायालयीन कामकाज पाहिले.

नागरिकांना लाचलुचपत प्रतिबंधक विभागाचे आवाहन..

लाचलुचपत प्रतिबंधक विभाग, नाशिक परिक्षेत्र, नाशिक यांच्यातर्फे नागरिकांना आवाहन करण्यात आले आहे की, कोणत्याही शासकीय कार्यालयात शासकीय अधिकारी किंवा कर्मचारी अथवा त्यांच्या वतीने कोणताही खासगी इसम लाचेची मागणी करीत असल्यास नागरिकांनी निर्भयपणे लाचलुचपत प्रतिबंधक विभागाकडे तक्रार नोंदवावी.

महाराष्ट्रातील नागरिकांच्या सोयीसाठी लाचलुचपत प्रतिबंधक विभागाकडे तक्रार करण्यासाठी टोल फ्री क्रमांक १०६४ सुरू करण्यात आला आहे. लाचलुचपत प्रतिबंधक विभागाच्या कार्यप्रणालीबाबत तसेच लाचेची मागणी झाल्यास तक्रार करण्यासाठी नागरिकांनी या क्रमांकावर संपर्क साधावा.

संपर्क क्रमांक :

• नाशिक : ०२५३-२५७५६२८, २५७८२३०
• अहिल्यानगर : ०२४१-२४२३६७७
• धुळे : ०२५६२-२३४०२०
• नंदुरबार : ०२५६४-२३०००९
• जळगाव : ०२५७-२२३५४७७
• टोल फ्री : १०६४
• नाशिक परिक्षेत्रीय कार्यालय व्हॉट्सअॅप क्रमांक : ९५४५६५१०६४