जळगाव || दि. ० २ ऑगस्ट २०२६ || (रियाज खान)-: पर्यावरण संवर्धनाचा संदेश समाजापर्यंत पोहोचविण्याच्या उद्देशाने मजहर पठाण फ्रेंड सर्कल व कादरिया फाउंडेशन यांच्या संयुक्त विद्यमाने उस्मानिया पार्क परिसरात सुमारे २०० विविध प्रकारच्या रोपांचे घरपोच वाटप करण्यात आले. या उपक्रमाला परिसरातील नागरिकांनी उत्स्फूर्त प्रतिसाद देत पर्यावरण रक्षणासाठी आपला सहभाग नोंदविला.
वाढते प्रदूषण, तापमानवाढ आणि हवामानातील बदल यामुळे पर्यावरणाचा समतोल बिघडत असल्याची चिंता व्यक्त करत, प्रत्येक नागरिकाने आपल्या घराजवळ किमान एक तरी झाड लावून त्याचे संगोपन करण्याचा संकल्प करावा, असे आवाहन आयोजकांनी यावेळी केले. वृक्षलागवड ही केवळ एक दिवसाची मोहीम नसून भावी पिढ्यांसाठी निरोगी आणि हरित पर्यावरण निर्माण करण्याची सामूहिक जबाबदारी असल्याचेही त्यांनी नमूद केले.
घरपोच पद्धतीने रोपे वितरित केल्यामुळे नागरिकांना सहजपणे या पर्यावरणपूरक मोहिमेत सहभागी होता आले. या उपक्रमातून केवळ रोपांचे वाटप न करता वृक्षसंवर्धनाचे महत्त्व, झाडांचे संगोपन आणि पर्यावरण संरक्षणाबाबत जनजागृती करण्यात आली.
आयोजकांनी सांगितले की, पर्यावरण संरक्षणासाठी अशाच प्रकारचे सामाजिक आणि जनहिताचे उपक्रम भविष्यातही सातत्याने राबविण्यात येणार असून अधिकाधिक नागरिकांना या मोहिमेशी जोडण्याचा प्रयत्न केला जाईल.
या प्रसंगी मजहर पठाण फ्रेंड सर्कल व कादरिया फाउंडेशनचे पदाधिकारी, कार्यकर्ते तसेच उस्मानिया पार्क परिसरातील अनेक नागरिक मोठ्या संख्येने उपस्थित होते. समाजाने एकत्र येऊन वृक्षलागवड आणि वृक्षसंवर्धनाची चळवळ अधिक व्यापक करण्याची गरज असल्याचे मत उपस्थितांनी व्यक्त केले.