ऑल इंडिया बागबान सोशल जस्टिस अँड वेल्फेअर असोसिएशनची पुरस्कार वितरण सोहळ्यानिमित्त पुणे येथे बैठक संपन्न….
सप्टेंबर महिन्याच्या पहिल्या आठवड्यात पुरस्कार वितरण सोहळ्याचे आयोजन
पुणे/जळगाव || दि. १४ जून २०२६ || [सलीम बागवान]-: ऑल इंडिया बागबान सोशल जस्टिस अँड वेल्फेअर असोसिएशनच्या वतीने महाराष्ट्र बागबान वर्किंग कमिटीची महत्त्वपूर्ण बैठक पुणे येथील अगरवाल कॉलनीमध्ये आयोजित करण्यात आली. या बैठकीचे अध्यक्षस्थान राष्ट्रीय अध्यक्ष डॉ. शरीफ बागवान यांनी भूषविले.
या बैठकीत महाराष्ट्रातील बागबान समाजातील विविध क्षेत्रांत उल्लेखनीय कार्य करणाऱ्या आय एस, आयपीएस अधिकारी, डॉ, वकील, शासकीय कर्मचारी तसेच सामाजिक क्षेत्रात विशेष योगदान देणाऱ्या व्यक्तींना सप्टेंबर महिन्यात मान्यवरांच्या हस्ते पुरस्कार देऊन सन्मानित करण्याचा निर्णय घेण्यात आला. सुमारे १०० व्यक्तींना पुरस्कार व सत्कार करण्याचे एकमताने ठरविण्यात आले.
डॉ. शरीफ बागवान यांनी मागील आठ महिन्यांतील संघटनेच्या कार्याचा आढावा घेत आगामी पुरस्कार वितरण सोहळ्याची रूपरेषा उपस्थितांसमोर मांडली. यावर सर्व पदाधिकाऱ्यांनी चर्चा करून सप्टेंबर महिन्याच्या पहिल्या आठवड्यात पुणे येथे भव्य स्वरूपात कार्यक्रम आयोजित करण्यास मान्यता दिली.
प्रत्येक जिल्ह्यातून पाच पुरस्कारार्थींची निवड करण्याची जबाबदारी संबंधित जिल्हा पदाधिकाऱ्यांवर सोपविण्यात आली असून, पुणे जिल्ह्यातून दहा पुरस्कारार्थींची निवड करण्यात येणार आहे. तसेच पात्र व्यक्तींची माहिती संकलित करून त्यांना निवडपत्र तातडीने पाठविण्याचेही ठरविण्यात आले. महाराष्ट्रातील राजकीय, सामाजिक व शैक्षणिक क्षेत्रातील मान्यवरांना या कार्यक्रमासाठी आमंत्रित करण्याचा निर्णय घेण्यात आला.
यावेळी संघटनेच्या विविध पदांवरील नियुक्त्याही जाहीर करण्यात आल्या. डॉ. सलीम अब्दुल रजाक बागवान यांची ऑल इंडिया बागबान सोशल जस्टिस. राष्ट्रीय कार्याध्यक्षपदी नियुक्ती करण्यात आली. तसेच डॉ. अकबर मोहम्मद बागवान यांची तेलंगणा प्रदेशाध्यक्षपदी, तर सलीम बशीर बागवान यांची पुणे जिल्हाध्यक्षपदी नियुक्ती करण्यात आली. नव्याने नियुक्त झालेल्या पदाधिकाऱ्यांचे उपस्थितांनी अभिनंदन करून त्यांना शुभेच्छा दिल्या.
या बैठकीस ऑल इंडिया बागबान सोशल जस्टिस ॲन्ड वेल्फेअर असोसिएशन राष्ट्रीय अध्यक्ष डॉ. शरीफ बागवान, महाराष्ट्र बागबान वर्किंग कमिटीचे उपाध्यक्ष हाजी शाकीर एजाज बागवान, डॉ. सलीम अब्दुल रजाक बागवान, रफिक बागवान, सलीम बशीर बागवान, शौकत बागवान ,हाजी मुस्ताक बागवान, जुबेर येडशीकर, अमान सलीम बागवान यांच्यासह विविध जिल्ह्यांतील पदाधिकारी व सदस्य उपस्थित होते.